Psalms 40

Kumutungamiri wokuimba. Pisarema raDhavhidhi.

1Ndakamirira Jehovha nomwoyo murefu;
iye akatendeukira kwandiri akanzwa kuchema kwangu.
2Akandibudisa mugomba rakadzika,
kunze kwamatope netsvina;
akamisa tsoka dzangu padombo
akandipa nzvimbo yakasimba kuti ndimirepo.
3Akaisa rwiyo rutsva mumuromo mangu,
rwiyo rwokurumbidza Mwari wedu.
Vazhinji vachaona, uye vachatya
uye vachaisa ruvimbo rwavo muna Jehovha.

4Akaropafadzwa munhu
akaita Jehovha ruvimbo rwake,
asingatariri kuna vanozvikudza,
kuna avo vanotsaukira kuna vamwari venhema.
5Haiwa Jehovha, Mwari wangu,
zvizhinji zvishamiso zvamakaita.
Zvinhu zvamakatitongera hakuna
angazvirondedzera kwamuri;
dai ndingataura nokureva pamusoro pazvo,
zvaizowandisa kuzvizivisa.

6Hamuna kufarira zvibayiro nezvipo,
asi nzeve dzangu makadziboora;
zvibayiro zvinopiswa nezvipiriso
zvezvivi hamuna kuzvireva.
7Ipapo ndakati, “Ndiri pano hangu,
ndauya, zvakanyorwa mubhuku pamusoro pangu.
8Ndinofarira kuita kuda kwenyu, imi Mwari wangu;
murayiro wenyu uri mukati momwoyo wangu.”

9Ndinoparidza kururama paungano huru;
handidziviri miromo yangu,
sokuziva kwenyu, imi Jehovha.
10Handivanzi kururama kwenyu mumwoyo mangu;
ndinotaura nezvokutendeka kwenyu noruponeso rwenyu.
Handivanzi rudo rwenyu nechokwadi chenyu
paungano huru.

11Regai kundinyima ngoni dzenyu, imi Jehovha;
rudo rwenyu nechokwadi chenyu ngazvindidzivirire nguva dzose.
12Nokuti matambudziko asingaverengeki akandikomberedza;
zvivi zvangu zvakandibata, uye handigoni kuona.
Zvakawanda kupfuura bvudzi romumusoro mangu,
uye mwoyo wangu waneta mukati mangu.

13Haiwa Jehovha, kundiponesa ngakukufadzei;
haiwa Jehovha, kurumidzai kundibatsira.
14Vose vanotsvaka kutora upenyu hwangu
ngavanyadziswe uye vanyonganiswe;
vose vanoda kuparadzwa kwangu
ngavadzoserwe shure vanyadziswe.
15Avo vose vanoti kwandiri, “Hekani waro! Hekani waro!”
ngavavhundutswe nokuda kwenyadzi dzavo.
16Asi vose vanokutsvakai
ngavafare uye vafarisise mamuri;
avo vanoda ruponeso rwenyu ngavarambe vachiti,
“Jehovha ngaakudzwe!”

17Asi ndiri murombo nomushayiwi;
dai Ishe vandifungawo.
Ndimi mubatsiri wangu nomununuri wangu;
haiwa Mwari wangu, musanonoka henyu.